“Lindy Hop” izena 1927an sortu omen zen Savoy Ballroom aretoan, Charles Lindbergh-ek Ozeano Atlantikoan zehar egin zuen hegaldi famatua omentzeko dantza-lehiaketa batean. Lindy izena Lindbergh-en laburdura da, hain zuzen, eta hop (salto, ingelesez), Ozeanoaren alde batetik bestera egindako saltoaren erreferentzia izango litzateke.

Lindy Hop estiloa AEBetan zehar hedatu zen. 1943ko abuztuaren 23ko Life aldizkariak “dantza nazional” izendatu zuen Lindy Hop delakoa. Denborarekin, Lindy Hop dantzak hainbat swing estiloren araberako eboluzioa izan zuen, hala nola West Coast, Jive, Boogie Woogie, Balboa, Wendy eta abar.

Teknikoki, 8 denborako oinarrizko pauso bat dauka eta “swin out” edo “whip” oinarrizko patroiaren arabera definitzen da. Oinarrizko patroi horietan, dantza-egiturak forma laukizuzen eta luzanga dauka eta dantzariak erdiko ardatzaren inguruan biraka aritzen dira aldi berean. Ardatz hori beti leku berean egon ohi da, pistatik zehar mugitu beharrean.